24 Ago 2016 A Agrupación Musical de Goián presenta en concerto “Unha noite de amor con Lela”

A actuación terá lugar este venres ás dez da noite na Praza do Seixo e forma parte da programación cultural de verán organizada polo Concello

A Agrupación Musical de Goián presentará este venres ás dez da noite na Praza do Seixo, o concerto “Unha noite de amor con Lela”, xunto a Silvia Ferre (voz), Belén Xestal (narradora) e Alfredo Susavila (piano).

A actuación forma parte da programación de verán “O Son da Praza”, organizada pola Concellaría de Cultura, que dirixe Cristina Martínez; unha programación que rematará ao día seguinte (sábado 27 de agosto) co espectáculo “Son galego, son cubano” do recoñecido músico Roi Casal e homenaxe a Neira Vilas.

Argumento do concerto “Unha noite de amor con Lela”

Lela é un dos personaxes da obra de Alfonso D. Castelao “Os vellos non deben namorarse”; unha das obras máis populares do teatro galego.

A temática do concerto é o amor nas súas diferentes persenzas e momentos. A través da narradora, introdúcense reflexións de caracter poético, e incluso irónico, que sirven para dar un fío argumental a través dos pensamentos, lembranzas e sentimentos de Lela.

Lela era unha moza atolada que enredaba con Don Saturio pero casou cun carabineiro para non vestir santos. Cando o seu esposo morre de tise, ela decide emigrar á Arxentina coa ilusión de atopar o verdadeiro amor.

 

 

 



X