16 Mar 2017 A escritora Montse Fajardo presenta o seu libro “Un cesto de mazás”, no mercado municipal de Tomiño, en memoria das vítimas do 36

Os actos, organizados pola Oficina da Igualdade con motivo do Día da Muller, continúan o sábado coa proxección da película “Sicixia”, de Ignacio Vilar

 

Tomiño, 16 de marzo de 2017.- Seguindo coas actividades programadas dende a Oficina de Igualdade do Concello de Tomiño, coa colaboración da Deputación de Pontevedra, e con motivo do 8 de marzo, Día Internacional da Muller, este venres, 17 de marzo, ás 20.30h, a xornalista e escritora Montse Fajardo, presentará no primeiro andar do Mercado Municipal, os seus libros “Un cesto de mazás” e “Matriarcas”.

 

Intervirán na presentación das obras a alcaldesa de Tomiño, Sandra González, Xosé Lois Vilar, do Instituto de Estudos Miñoranos; Luis Bará, autor de “Non des a esquecemento”, e a propia Montse Fajardo, escritora e xornalista.

Segundo as palabras da autora “Un cesto de mazás é unha homenaxe imprescindibel ás vítimas silenciadas da nosa recente historia”. Trátase dun texto adicado á memoria das vítimas do 36 e dos anos posteriores.

Durante o acto, presentarase tamén o vídeo “O faiado da memoria”.

 

Por outra banda e continuando co programa de actos organizados por Igualdade, o sábado 18 de marzo, tamén ás 20.30h, no Auditorio de Goián, proxectarase a película “Sicixia”, do director Ignacio Vilar, director da exitosa “A Esmorga”.

A sonoridade do mar, da terra e da xente da Costa da Morte protagoniza a película, un diálogo entre a ficción e o documental.
A programación continúa na próxima semana con actividades e obradoiros dirixidos ao alumnado de primaria e secundaria do municipio.

 

 



X