15 Dec Unha enfermeira galega residente en Mozambique explica o proxecto co Fondo Galego de Cooperación nos concellos socios
Unha enfermeira galega residente en Mozambique explica o “Proxecto co Fondo” nos concellos socios do Fondo Galego de Cooperación
María José Castro achega a Bergondo, Lugo, Sarria, Ourense, O Barco, Pontevedra, Silleda, A Coruña e Oleiros as accións impulsadas a prol da saúde materno-infantil
A enfermeira galega María José Castro, directora executiva da Fundaçao Encontro, percorrerá esta semana nove municipios socios do Fondo Galego de Cooperación e Solidariedade para dar a coñecer o proxecto a prol da saúde infantil e materna apoiado en Mozambique. A coruñesa, que desde hai 16 anos reside e traballa no país africano, inicia ás 17 horas en Bergondo as recepcións institucionais, tras reunirse esta mañá coa subdirectora xeral de Cooperación Exterior da Xunta de Galicia, Pilar Romero.
María José Castro participará ademais nas xuntanzas da Rede Municipalista Solidaria, que se celebrarán nas catro capitais de provincia, ás que está convocado o persoal técnico delegado do Fondo Galego en cada un dos 88 concellos e as dúas deputacións socias. Nestes encontros, a Secretaría Técnica dá conta das actividades de sensibilización fronte as desigualdades realizadas durante ao ano, como obradoiros de fotografía social, charlas sobre as nenas e nenos soldados, actuacións musicais, exposicións, contacontos, etc.
Nas xuntanzas póñense asemade en valor os proxectos de cooperación internacional impulsados en países do Sur, como as axudas de post emerxencia para reconstruír un centro sanitario tras as inundacións nos campamentos saharauís ou as destinadas ao equipamento informático dun concello ecuatoriano logo do terremoto. Desta volta, ademais, contarase co testemuño directo chegado desde África, que achegará os bos resultados do traballo realizado por activistas locais para concienciar a mulleres e familias sobre a importancia de acudir ás consultas pre e post parto, así como de dar a luz na maternidade.
Alén doutras recepcións nos concellos de Silleda ou Oleiros, a axenda de María José Castro inclúe senllas charlas abertas ao público para dar a coñecer a realidade mozambicana e a utilidade dos proxectos de cooperación para o desenvolvemento cofinanciados polas administracións locais galegas. A primeira terá lugar na Casa Consistorial de Sarria mañá martes ás 16.30 horas e a outra será o mércores ás 18 horas no Edificio de Usos Múltiples do Barco de Valdeorras.
O proxecto coa Fundação Encontro xa fora supervisado sobre o terreo pola traballadora social do Concello de Bergondo Mónica Mourín, que pasou un mes colaborando con esta entidade a través do programa de voluntariado internacional Vacacións con Traballo, dirixido a persoal técnico municipal. Do mesmo xeito, tiveron a oportunidade de coñecelo as catro concelleiras de Lugo, Moaña, San Sadurniño e Verín que viaxaron a Mozambique para participar nun intercambio de experiencias en materia de igualdade coas súas homólogas.
O Fondo Galego
O Fondo Galego de Cooperación e Solidariedade está formado por 88 concellos (entre eles o de Tomiño) e as deputacións da Coruña e Lugo, que concentran a través desta rede os seus esforzos no eido da cooperación ao desenvolvemento. Garántese deste xeito unha xestión profesional e transparente, así como a realización de proxectos con impacto nos países do Sur e a sensibilización da sociedade galega a prol da solidariedade internacional. Desde a súa fundación en 1997, o Fondo Galego ten desenvolvido máis de 150 proxectos en 25 países e promove numerosas actividades e materiais en relación aos desequilibrios Norte-Sur.
AXENDA
12/12/2016 17.00h Concello de Bergondo. Recepción institucional.
13/12/2016 10.30h Concello de Lugo. RMS no Centro de Convivencia Fingoi.
16.30h Concello de Sarria. Charla na Casa Consistorial.
14/12/2016 10.30h Concello de Ourense. RMS no Centro Cívico Colón.
12.30h Concello de Ourense. Recepción institucional.
17.30h Concello do Barco. Recepción institucional.
18.00h Concello do Barco. Charla no Edificio de Usos Múltiples.
15/12/2016 10.00h Concello de Pontevedra. Recepción institucional.
10.30h Concello de Pontevedra. RMS no Pazo da Cultura.
17.30h Concello de Silleda. Recepción institucional.
16/12/2016 10.30h Concello da Coruña. RMS no Centro Cívico Cidade Vella.
12.30h Concello de Oleiros. Recepción institucional.