O Consello da Infancia e Adolescencia de Tomiño prepara unha curta sobre o trato desigual que reciben nenos e nenas na sociedade actual O colectivo, integrado por nenos e nenas de Primaria e Secundaria, presentará o traballo no 5º Encontro de Concellos, que se celebrará en Oviedo no mes de maio

Trátase dun traballo audiovisual, duns 5 minutos de duración, sobre o trato desigual que reciben nenos e nenas no eido da educación e da sociedade en xeral. Estrela é a protagonista da cinta; unha moza que vai reflexionando sobre a forma que lle tratan ou as tarefas que lle asignan na súa casa, no instituto, na rúa; o que se agarda dela, as maneiras nas que lle falan os demais…e decide adoptar unha actitude distinta na súa vida.

Constituído por nenos e nenas de Primaria e Secundaria, o Consello da Infancia e Adolescencia de Tomiño, ten coma presidenta a Sofía Areal, alumna do IES Antón Alonso Ríos e leva funcionando dende o 15 de decembro do pasado ano. Este colectivo, promovido polo Concello de Tomiño, é un dos requisitos para conseguir o selo de Cidade Amiga da Infancia concedido por Unicef. Na actualidade está formado por 22 persoas, de entre 11 e 17 anos. O nome escollido é “Voces Novas” xa que queren converterse nunha ferramenta para facer que se escoiten as súas voces, opinións e ideas, e están a traballar nesta liña, participando na vida municipal. De feito están a perfilar unha moción que presentarán ao próximo pleno ordinario, pedindo o seu recoñecemento oficial.



X