17 Set Tomiño distingue á artista visual gañadora da XX Bienal de Cerveira A videoperformance "Figuras decorativas", de Verónica Vicente, pasará a formar parte da colección da Fundação Bienal de Arte de Cerveira e poderá visitarse até o día 23 deste mes

A videoperformance “Figuras decorativas”, de Verónica Vicente, pasará a formar parte da colección da Fundação Bienal de Arte de Cerveira e poderá visitarse até o día 23 deste mes.

A alcaldesa de Tomiño, Sandra González, acompañada da concelleira de Cultura, Cristina Martínez, recibiron no Concello, a Verónica Vicente, a artista visual tomiñesa, que se fixo cun dos primeiros premios de adquisición da XX Bienal de Arte de Vila Nova de Cerveira.

A alcaldesa felicitou a Verónica polo seu excelente traballo, ofrecéndose a poñela en contacto con outros artistas da vila e colaborar para a difusión da súa obra. “Eu sempre digo que en Tomiño estamos rodeados de talento, e este é un exemplo máis; queremos potenciar e acompañar aos nosos artistas, pondo en valor o seu traballo”, explicou a rexedora.

Verónica Vicente, pola súa banda, agradeceu o recoñecemento do Concello e confesou estar sorprendida polo premio que lle concedeu a Bienal de Cerveira, aínda que non é a primeira vez que se presenta a este xa famoso certame.

A súa videoperformance “Figuras decorativas” pasará a formar parte deste modo, da colección permanente da Fundação Bienal de Arte de Cerveira, e poderase visitar até o 23 de setembro na localidade fronteiriza (http://bienaldecerveira.org/xx-bienal/). Define a súa creación como un proxecto de fotografía e vídeo, cun fondo de espazos señoriais, gravado nun palacete portugués. “É facer do corpo unha escultura e reivindicar así a figura da muller. Nos fotogramas pode apreciarse o corpo feminino en movemento, cuberto por unha saia, que non lle deixa moverse con liberdade, e que finalmente é retirada. “É unha idea en contra do esclavismo que crea a moda”, explica a artista.

Verónica Vicente  naceu en Tomiño en 1988. Licénciase en Belas Artes na Universidade de Vigo. Realizou un máster en Arte, Museología e Crítica Contemporáneas, na Universidade de Santiago de Compostela, e outro de Fotografía en EFTI, en Madrid.

Recibiu o primeiro premio no I Concurso Internacional de Fotografía de Escultura “Un Museo Imaxinario da Escultura”, do Museo Nacional de Escultura, así coma o premio “Novos Valores 2011”, na modalidade de fotografía, da Deputación de Pontevedra.

Agora vén de recibir un dos premios de adquisición da XX Bienal de Arte de Vila Nova de Cerveira; un proxecto que cumpre 40 años, sendo a bienal máis antiga de Portugal.

A súa obra formou parte de exposicións colectivas no Auditorio de Galicia, de Santiago de Compostela; no Pazo da Cultura e no Sexto Edifico do Museo de Pontevedra; no CENIMA de Foz, Lugo; no Centro Cultural Marcos Valcárcel de Ourense, no Espazo OFF de EFTI e no Círculo de Belas Artes de Madrid.

Tamén levou a súa producción artística a Arts Santa Mónica, de Barcelona; Musée deas Beaux-Arts, de Angers (Francia); Museo San Juan de Deus, de Camagüey (Cuba), e formou parte de feiras e bienais como a IX Feira de Arte Contemporánea de Arévalo (Ávila), a XI Bienal Pintor Laxeiro de Lalín (Pontevedra), ou a 17ª edición da Bienal de Cerveria.

O seu traballo tenta reflexionar sobre a identidade do individuo e a capacidade de adaptarse a unha sociedade limitada por todo tipo de patróns.

Utilizando indistintamente a performance como a fotografía, Verónica Vicente traslada a reflexión sobre a identidade, do ámbito privado ao público, e a súa investigación artística céntrase en observar a capacidade socializadora que ten o home, e alertar sobre os perigos de perder a verdadeira identidade nese proceso.