08 Mai Tomiño participa no “Depo desafío” organizado pola Deputación de Pontevedra A actividade, enmarcada no Plan Estratéxico de Deportes, terá lugar entre xullo e outubro nos concellos da Cañiza, Cerdedo-Cotobade, O Grove, A Guarda, O Rosal, Vigo e Tomiño

Tomiño é un dos sete concellos que participarán no “Depo desafío” organizado pola Deputación de Pontevedra para este verán.

A actividade, presentada onte en Pontevedra e enmarcada no Plan Estratéxico de Deportes, terá lugar entre xullo e outubro nos concellos da Cañiza, Cerdedo-Cotobade, O Grove, A Guarda, O Rosal, Vigo e Tomiño.

A presidenta da Deputación de Pontevedra, Carmela Silva, acompañada da deputada de Deportes, Chelo Bicada e do deputado de Turismo, Santos Héctor, xunto a representantes dos concellos colaboradores, presentou onte o novo formato deportivo “Depo desafío”, que se desenvolverá entre xullo e outubro por estes sete concellos da provincia e que está destinado a deportistas amantes do deporte extremo.

Segundo informa o concelleiro de Deportes de Tomiño, Ismael Troncoso, quen asistiu á presentación, o “Depo desafío” consiste nun novo proxecto dirixido a persoas maiores de 18 anos, no que se combinan probas deportivas en contornas naturais de gran beleza: desde a beira do Miño, ata a ría de Arousa, montes da Cañiza e de Cerdedo-Cotobade e praias coma a de Samil en Vigo. Máis ao detalle, a presidenta provincial explicou onte, que o novo formato deportivo inclúe cinco probas diferentes que van desde a carreira a pé, ata a travesía a nado en mar, o tríatlon, a carreira en bicicleta de montaña BTT e o trail, co fin de “popularizar estas probas e dar a coñecer as vilas e paraxes onde se desenvolven, e promover e concienciar á poboación sobre a práctica do deporte popular no medio natural dunha maneira respectuosa, sustentable e responsable”.

A primeira das probas do “Depo desafío” terá lugar o 22 de xullo entre os concellos de Tomiño, O Rosal e A Guarda e consistirá nunha carreira a pé á beira do Miño, nun percorrido de 21 quilómetros e 97 metros que finalizará aos pés do monte de Santa Trega.

O 2º desafío levarase a cabo o 12 de agosto, e consistirá nunha travesía a nado de 1.200 metros entre o paseo marítimo do Grove e a Illa dá Toxa.

Pola súa banda, tamén en agosto, terá lugar a 3ª proba do “Depo desafío”, que estará centrada no trail polo concello da Cañiza. Para esta terceira proba, as e os participantes deberán calzar zapatillas de trekking e prepararse para subidas e baixadas continuas a través dun percorrido de 15 quilómetros con espectaculares vistas. A 4ª cita será o 16 de setembro, e consistirá nunha BTT polo concello de Cerdedo-Cotobade, a través de 35 quilómetros, nos que os participantes terán que sortear múltiples escollos ata chegar á liña de meta.

A última das probas será o 7 de outubro no concello de Vigo, na praia de Samil, e consistirá nun tríatlon na modalidade distancia sprint, con 750 metros a nado, 20 quilómetros en bicicleta e 5 de carreira.

A partir das 9.00 horas de hoxe e até o día 2 de xuño, abriuse o prazo de inscrición. En total, admitiranse un máximo de 300 participantes (cun custo de 30 euros por persoa), que inclúe a participación en todas as probas, en categoría masculina e feminina.

Entre o 9 e o 19 de xullo, de 9 a 14 horas, os participantes deberán recoller os dorsais no Servizo de Deportes da Deputación.

En cada unha do cinco probas haberá un gañador e unha gañadora que obterán trofeo. Con todo, soamente gañarán o “Depo desafío” a muller e o home que finalicen, polo menos, 4 probas e consigan os máximos puntos. Tanto a gañadora como o gañador recibirán un trofeo e un dorsal personalizado e intransferible para o maratón Berlín, que inclúe voo e aloxamento para el/ela e acompañantes.

Ismael Troncoso mostrou o seu agradecemento á Deputación de Pontevedra pola posta en marcha da iniciativa, que permite combinar a práctica deportiva co fomento do turismo e a promoción do territorio.