O multipremiado documental “O Gran Camiño” chega este venres á praza de Goián, dentro do ciclo Cine na Rúa, organizado pola Concellería de Cultura do Concello de Tomiño dentro da Axenda de Verán 2022.

Narrado en primeira persoa por Alba e Raúl, dous cineastas que deciden cargar as cámaras nas súas mochilas para emprender unha aventura de miles de quilómetros polas grandes rutas a pé do mundo, ‘O gran camiño’ é un documental que fomenta a exploración, tanto na parte física, cos seus protagonistas viaxando a diferentes lugares do mundo, como na psicolóxica, algo que os seus propios responsables remarcan coa frase “os grandes camiños sempre terminan nun mesmo”.

O Pacific Crest Trail, un dos sendeiros máis extremos dos EEUU, o misterioso Camiño Inca a Machu Picchu, a ancestral ruta do Kumano Kodo entre grandes templos xaponeses, ou o europeo Camiño de Santiago, non son máis que unha escusa para unha viaxe máis profunda ao encontro da xente dos camiños, cos que se tratan temas universais como as fronteiras, o amor e o sacrificio pola familia, os conflitos sociais, a espiritualidade, o coidado do noso planeta, a conexión coa Pachamama, ou o regreso a un mesmo.

A cinta gañou máis de 20 premios internacionais en 2021, ano da súa presentación e chegou a ter 6 nomeacións nos Premios Goya de Cine.