01 Dec Tomiño pecha uns orzamentos históricos de 10,63 millóns de euros para 2026
Son os primeiros orzamentos nos que non se destina ningunha partida a amortizacións de crédito, xa que o Concello ten débeda cero
Tomiño é un dos primeiros concellos da provincia en aprobar os seus orzamentos
Tomiño dá un paso histórico na súa planificación económica co Concello a piques de converterse nun dos primeiros municipios da provincia en aprobar os seus orzamentos municipais para 2026 que serán de 10,63 millóns de euros, a cifra máis alta da súa historia. O departamento de Intervención xunto co concelleiro de Facenda remataron o documento dos orzamentos do vindeiro ano, que será presentado aos grupos da oposición para a súa aprobación no pleno ordinario de decembro.
A alcaldesa de Tomiño, Sandra González, subliñou que “estes orzamentos supoñen un salto cualitativo para o noso Concello. Nunca antes destináramos tantos recursos ao desenvolvemento do municipio, aos investimentos nas parroquias e a cuestións como a mellora das condicións do noso equipo de traballo. É un exercicio de planificación responsable, co que afianzamos a sustentabilidade económica do municipio e a calidade dos servizos públicos”.
O incremento máis significativo prodúcese no capítulo de persoal, debido á entrada en vigor da modificación da RPT, que revaloriza os postos das e dos traballadores municipais e recoñece novas funcións e responsabilidades, cun impacto económico de máis de 200.000 euros distribuído en dúas fases: o 75% en 2026 e o 25% en 2027. Este proceso foi resultado de meses de diálogo e consenso con traballadores e sindicatos, consolidando un modelo de xestión interna máis xusto e equilibrado.
Nestes orzamentos para 2026 destaca tamén a ausencia de amortizacións de crédito, grazas á débeda cero que presenta o Concello e ao superávit de máis de 3,5 millóns de euros pechado en 2024. A boa xestión municipal permitiu tamén executar case 2 millóns de euros en proxectos europeos durante o mesmo exercicio, demostrando a capacidade de captación de fondos externos. Pola súa banda, o capítulo de investimentos prioriza as intervencións nas parroquias como o plan de actuacións marcadas nos Consellos Parroquiais, como os saneamentos autónomos ou nas traídas de augas.
O Goberno local tamén alerta de que, a pesar destes avances, Tomiño segue asumindo gastos que son competencias da Xunta, como o financiamento do SAF, o centro de día, as escolas infantís ou o canon de saneamento, que suman case un millón de euros. “Lamentablemente vemos que a Xunta non só non colabora cos municipios, senón que lles quita diñeiro ao ter que afrontar dende os recursos ordinarios do concello cuestións de competencia unicamente do goberno autonómico”, destacou a alcaldesa.
A capacidade de captación de fondos do Concello permitirá que, aínda que non se recollan nos orzamentos, Tomiño investirá máis de 5 millóns de euros ao longo do 2026 en distintas obras e inversións como a Senda do Pego ou a Casa do Tempo financiadas con fondos europeos NextGenerationEu, fondos transfronteirizos, de Confederación Hidrográfica do Miño Sil e doutras administracións.