20 Mar Tres medallas para o Club Deportivo Miño- Os Teixugos na II Copa de España de Slálom O club tomiñés conseguiu ouro, prata e bronce na competición celebrada esta fin de semana en Mondariz-Balneario, en augas do río Tea
Nova competición e novas medallas para o Club Deportivo Miño-Os Teixugos. O equipo tomiñés acudiu esta fin de semana á II Copa de España de Slálom, celebrado nas augas do río Tea ao seu paso por Mondariz-Balneario, no que participaron máis de 200 piragüistas, os mellores do slálom español coa única baixa da olímpica Maialen Chorraut, que faltou á cita por lesión.
O Club Deportivo Miño inscribiu a un total de 15 deportistas, dos que 10 participaron na competición oficial e outros cinco acudían en calidade de abridores. E gran balance para o equipo tomiñés, que rematou a fin de semana con tres medallas no peto: un ouro, unha prata e un bronce. O responsable de Deportes do Concello de Tomiño, Ismael Troncoso, quere felicitar aos deportistas do club por estas novas medallas e polos resultados acadados nas distintas categorías, que demostran o alto nivel do piragüismo no municipio.
Bos resultados
En K1 veterano Emilio Rodríguez foi quen de facer o mellor tempo da súa categoría e conseguir a medalla de ouro para o equipo. Mentres, en C1 sénior Luís Fernández realizou unha baixada impresionante que lle valeu a medalla de prata por diante do olímpico Ander Elosegui, a seu segundo metal na Liga Española de Slálom Olímpico, o que demostra o bo momento que está a vivir.
Xa en K1 sénior, a categoría máis numerosa e igualada, Manuel Ochoa fixo unha boa clasificatoria cunha baixada rápida e sen penalizacións que lle permitiu coarse na final. O domingo fixo unha baixada limpa e moi rápida lle valeu unha medalla de bronce a apenas un segundo do segundo clasificado, Unai Nabaskues, e a tres do gañador, Joan Crespo.
Pola súa banda, na categoría absoluta sénior feminino, Laura Alonso foi a mellor no décimo cuarto lugar cun recorrido sen penalizacións, Laura Soutelo e Marina Ruedas decimo oitava e décimo novenas respectivamente. Na categoría cadete, Ariadna Pereira rematou quinta en canoa pero non superou o tempo de corte para ir á final, mentres que na categoría K1 entrou nas finais e rematou cuarta, rozando a medalla de bronce. Na clasificación final por equipos o Club Deportivo Miño-Teixugos remataron sétimos.
O seguinte reto para estes deportistas será superar os selectivos para formar parte do equipo español sénior e sub-23 de slálom, que se celebraran en abril e maio nas localidades de Pau e Seu D´Urgell, e para os que están clasificados Brais Castro e Luís Fernández en canoa, e Manuel Ochoa en kayak.