Medrando

Aínda que a maioría da poboación infantil e adolescente do noso municipio quedará sen poder acceder á programación habitual das actividades culturais, deportivas e de ocio que se veñen realizando presencialmente cada ano, tan importantes para o seu desenvolvemento e integración social, d esde o Servizo de Educación e Apoio Familiar queremos ofertar recursos de lecer adaptados á nova realidade.

 

Con esta premisa, e adaptándonos ás posibilidades, impulsamos dúas iniciativas a través de diferentes plataformas virtuais:

Por un lado, no Medrando En Familia queremos continuar facilitando recursos, guías e tarefas para disfrutar cos vosos pequenos e pequenas no proceso de crianza, e así aproveitar esta situación para compartir tempos e fortalecer vínculos de maneira positiva no fogar.

 

Por outra banda, estableceremos encontros online máis enfocados á poboación máis nova no Espazo Xoven, un espazo de achegamento onde se fomente o autocoidado emocional e a autonomía a partir de 11 anos, aportando pautas e orientacións en base ás súas inquedanzas, adaptados á súa maduración psicosocial.

 

Non nos podemos esquecer que con estes encontros virtuais se mantén un grupo social e unha rede apoio aberta e continuada.

Medrando en Familia:

O programa Medrando en Familia continúa preto das familias dando apoio ás súas demandas de crianza da cativada e outras inquedanzas, creando unha rede de apoio virtual e un espazo de confianza a través das novas formas de comunicación.

 

O obxectivo é seguir as dinámicas de grupos que víñamos facendo pero cunha metodoloxía adaptada a unha relación de grupo virtual, a través da plataforma “Zoom”, onde levaríamos a cabo todo tipo de actividades de estimulación favorecedoras do desenvolvemento integral. A través destes encontros online queremos dotar á familia de recursos con actividades, xogos, cancións e diversas pautas, ademais de acompañalas nas rutinas das crianzas e guiar no desenvolvemento da súa autonomía e responsabilidade na casa.

Medrando Espazo Xoven:

Para rapaces e rapazas máis madurxs a iniciativa que plantexamos é a de ofrecer un espazo virtual de encontro, confianza e apoio, a través da plataforma “Zoom”, onde atender ás necesidades, intereses e motivacións dxs participantes. A adolescencia é unha etapa madurativa na que se producen cambios transcendentais no crecemento e na identidade persoal, e queremos botar unha man contribuíndo nese proceso.

 

O obxectivo é axudarvos a xestionar as inseguridades e inquedanzas propias deste tempo que vos toca vivir. Coñecer as nosas capacidades, emocións, habilidades, motivacións e cómo nos relacionamos co entorno son aspectos que permiten empoderarnos, madurar e tomar decisións sobre o noso rumbo vital, desde un punto de vista responsable e respectuoso.

 

Dependendo do número de participantes realizaremos sesións de encontro virtual durante o verán, a modo distendido e cercano, e cada semana subirase á web un vídeo resumo con pequenos trucos sobre os conceptos traballados, accesibles a calqueira persoa..