02 Xan A Cabalgata de Reis percorrerá todas as parroquias de Tomiño Haberá 3 itinerarios que comezarán ás 16:00h en distintos puntos do Concello e rematarán ás 18:15h no Seixo
Os reis e paxes repartirán caramelos, xogos e participacións para un sorteo de agasallos entre as e os máis pequenos
E os días 3 e 4 de xaneiro haberá inchables de balde no Seixo
Comeza a conta atrás cara a noite máis máxica cos nenos e nenas como os grandes protagonistas. Co obxectivo de facerlles máis levadeira a espera, o Concello de Tomiño converterá a Praza do Seixo nun paraíso para os máis cativos e cativas da casa. Os vindeiros 3 e 4 de xaneiro haberá inchables totalmente de balde para o público infantil de 16:00 a 20:00 horas.
E o 5 de xaneiro Tomiño recibirá un ano máis as Súas Maxestades os Reis Magos de Oriente. Ante a boa acollida que tivo o pasado ano, nesta ocasión a comitiva real volverá a percorrer todas as parroquias do municipio.
A alcaldesa, Sandra González, asegura que este modelo de cabalgata “permite que os nenos e nenas poidan coñecer de xeito máis cómodo e tranquilo ás Súas Maxestades”. Ademais, engade que os Reis percorrerán cada barrio con moita calma polo que “haberá tempo dabondo para recibir agasallos e uns números para participar no sorteo de tres patinetes, dúas bicicletas e catro bonos para a Granxa Escola Corazón de Carballo”. Os resultados publicaranse nas redes sociais do Concello.
A comitiva comezará ás 16.00 horas en distintos puntos do Concello e rematará ás 18.15 horas horas na Praza do Seixo, onde se celebrará a recepción dos cativos e cativas aos Reis Magos e terá lugar o sorteo de premios. Para asegurarse de que toda a veciñanza goza desta tarde festiva, as diferentes treboadas do Concello amenizarán as rúas con música dende ás 17:00 horas.
En canto ao percorrido da Cabalgata, este ano o Concello organizou tres itinerarios que pasarán por diferentes puntos de Hospital, Taborda, Piñeiro, Sobrada, Currás, Amorín, Carregal, Forcadela, San Salvador de Tebra, Santa María de Tebra, Vilameán, Cristelos, Pinzás, Vilachán do Monte, Barrantes, Vilachán, Estás, Figueiró, Goián e Tomiño.
Para realizar a Cabalgata polas parroquias o Concello contará coa colaboración da Policía local, Protección Civil, un grupo de coches clásicos e coas asociacións Estrelas da Noite, Ciklon, Revolución Show, Luces de Tomiño e Virxe do Alivio.
A Concellería de Cultura convida a todos os tomiñeses e tomiñesas e aos veciños e veciñas da comarca a que participen nesta tradicional festa.