27 Feb Reactívate abre o seu prazo de inscrición con máis dunha ducia de actividades para o envellecemento activo As persoas interesadas poderán inscribirse de xeito presencial en Servizos Sociais ou chamando ao 986 622 001

Diminuír o risco de padecer enfermidades, manter un ton físico e cognitivo axeitado e participar de xeito activo na sociedade. Eses son algúns dos obxectivos do programa de maiores Reactívate, un plan de envellecemento activo e de hábitos saudables posto en marcha pola Concellería de Servizos Sociais do Concello de Tomiño co obxectivo de promover as relacións sociais e a autonomía persoal entre os maiores de 65 anos.

Trátase dun programa ideado para fomentar a vida activa entre as veciñas e veciños de maior idade da vila, ofrecendo “un completo plan de actividades que lles poidan resultar de interese á vez que útiles para a súa vida cotiá. O obxectivo destes obradoiros, cursos, saídas e actividades é axudarlles a seguir en activo, animalos a saír do seu fogar e a relacionarse con máis xente tanto da súa idade como máis nova”, explica a concelleira de Cultura e Servizos Sociais, Cristina Martínez. Dende o Concello animan a todas e todos os maiores do municipio a participar neste programa para conseguir un envellecemento activo e unha boa calidade de vida.

Esta nova edición do programa abrirá as súas portas este mes de marzo con máis dunha ducia de actividades impartidas por expertos coas que favorecer a estimulación cognitiva ou a mobilidade, pero tamén coas que achegar aos maiores de Tomiño a outro tipo de actividades menos habituais entre as persoas con máis de 65 anos.

Así, os interesados en participar neste programa poderán desfrutar de actividades como risoterapia, informática, ximnasia e pilates, accións para a promoción da saúde ou manualidades, ademais de actividades coa comunidade, un club de lectura, un cinefórum ou roteiros saudables. Xunto con estas nove actividades tamén están programados catro obradoiros de expresión corporal, memoria, escritura creativa e xogos da nosa vida.

As sesións desenvolveranse martes e venres en horario de mañá no Centro Vontade e terán un custe de 15 euros mensuais. Para recibir máis información ou realizar a solicitude de inscrición as e os interesados poden dirixirse a Servizos Sociais ou chamar ao teléfono 986 622 001 entre as 08.00 e as 15.00 horas.