15 Nov Teatro musical para un concerto de Santa Icía diferente en Tomiño A Agrupación Musical de Goián porá banda sonora ao espectáculo ‘A familia Brañas’ da Cova das Letras este sábado 18
Tomiño celebra o día da patroa da música por todo o alto. A Agrupación Musical de Goián subirase ao escenario este sábado 18 de novembro para ofrecer ao público un concerto de Santa Icía diferente: un espectáculo de teatro musical no que integrantes da propia agrupación e da súa banda xuvenil porán banda sonora a unha divertida obra baixo a batuta de Pedro Villarroel.
Será con ‘A familia Brañas’, un espectáculo de A Cova das Letras no que os músicos da Agrupación estarán acompañados sobre o escenario polos actores Cristina Collazo, Anxo García e Martiño Mato. Dirixido a público familiar, a historia comeza cando as e os protagonistas emprenden unha viaxe en busca dun mundo mellor atravesando o perigoso estreito das Augas Fétidas. No medio do camiño, Franki e Lobis atópanse coa Santa Compaña, unha banda de músicas errantes dirixidas e encabezadas pola temible e cruel Morte. A ela únense pensando que van en busca da boa vida, pero a Morte quere facelos “pasar a mellor vida” dando comezo a unha historia chea de peripecias que non deixarán indiferentes a ninguén.
A alcaldesa, Sandra González, anima a toda a veciñanza a achegarse ao Auditorio de Goián e gozar un ano máis dun espectáculo único co que a Agrupación Musical namorará ao público. A actuación será ás 19.30 horas con entrada de balde.