24 Xan Tomiño acolle un curso formativo para persoas coidadoras de doentes con demencia neurodexenerativa
O curso será impartido por AFAGA coa colaboración do Concello dende o 16 de febreiro na Escola Obradoiro O Regatiño de Goián
Aprender a coidar á e ao doente pero tamén á persoa coidadora. Ese é un dos obxectivos de ‘Coidados compartidos’, un curso formativo de oito horas para persoas coidadoras de pacientes cunha demencia neurodexenerativa impartido pola Asociación de Familiares de Enfermos de Alzhéimer e outras demencias de Galicia, AFAGA, en colaboración co Concello de Tomiño.
A Escola Obradoiro O Regatiño de Goián acollerá esta formación que se centrará nos coidados das persoas con demencia pero tamén da súa contorna familiar. O curso estará impartido por unha psicóloga sanitaria especializada para axudar a persoas en contornas rurais que se atopen nesta situación.
O programa achegará a todas e todos os participantes formación e información sobre o alzhéimer e outras demencias neurodexenerativas, así como dos servizos e recursos segundo a localidade onde se intervén para mellorar a súa calidade de vida, prestando atención ao coidado do coidador ou coidadora, ofrecendo consellos e procedementos para evitar a sobrecarga e o estrés que a situación pode causar.
O curso impartirase os días 16 e 23 de febreiro e o 1 de marzo de 16.30 a 19.15 horas. As persoas interesadas poden xa inscribirse directamente en AFAGA chamando aos teléfonos 986 229 797 (extensión 4) e 610 437 895 ou enviando un correo electrónico a formacion@afaga.com.
A alcaldesa de Tomiño, Sandra González, quixo destacar “o noso agradecemento a AFAGA polo seu labor e o apoio e colaboración continua con iniciativas como estas, xa que é moi importante brindar formación a todas aquelas persoas que desempeñan o valioso papel de coidadores e coidadoras de persoas dependentes. Debemos lembrar que é crucial coidar tamén da saúde mental e emocional dos propios coidadores e coidadoras, ofrecendo ferramentas que fortalezan a quen asume esta responsabilidade”.
O envellecemento é o principal factor de aparición dunha demencia e as proxeccións demográficas de Galicia prevén un aumento das persoas maiores de 65 anos do 23 ao 41% no ano 2050. Por este motivo, AFAGA súmase a esta formación enmarcada no proxecto ‘Coidados Compartidos’ impulsado pola Federación Alzhéimer Galicia (FAGAL) e salienta a importancia deste tipo de cursos “neste contexto rural de envellecemento ao que se engade a escaseza de servizos e a ausencia de intervencións. Porque esta realidade non só afecta á persoa que padece a enfermidade, se non a todo o núcleo familiar”.