13 Xuñ Tomiño pon en marcha unha nova xornada de adopción de cans e gatos Está organizada polo grupo de voluntariado da OMIX de Tomiño e celebrarase este sábado 17 de 10.00 a 14.00 h no Campo da Feira
A OMIX do Concello de Tomiño pon en marcha unha nova xornada de sensibilización e adopcións de cans e gatos, un evento co que se busca concienciar sobre a tenencia responsable de mascotas e fomentar a adopción de animais de compañía. A cita será este sábado 17 de xuño de 10.00 a 14.00 horas no Campo da Feira.
A xornada está organizada polo grupo de voluntariado da OMIX de Tomiño en colaboración con varias protectoras da comarca, como Aloia, Tu eres nuestra ayuda ou Bai sen pulgas. O obxectivo é promover a adopción fronte á compra de animais de compañía, así como concienciar a todas as persoas participantes da importancia de non abandonalos ao longo do ano, facendo especial fincapé na tempada estival. Unha iniciativa de sensibilización que cobra aínda máis relevancia tendo en conta que España sitúase á cabeza de Europa en cifras de abandono animal, con 700 mascotas abandonadas cada día.
Durante toda a mañá do sábado o Campo da Feira converterase nun lugar de encontro para posibles persoas adoptantes, onde voluntarios e voluntarias asesorarán sobre o proceso para adoptar unha mascota. Ademais, recolleranse alimentos e material novo ou usado en bo estado para cans e gatos que se doará ás protectoras participantes.
Dende o Concello de Tomiño convídase a toda a veciñanza a participar nesta xornada de sensibilización e achegar o seu gran de area.